قبل عرضك قطك +قبل التبني

اهلين بالجميع

من خلال متابعتي لقسم التبني حسيت انه محتاج مثل هالموضوع لأن تبني القطط مسألة كبيره ومالازم نستهين فيها

هذي بعض النصائح اللي يحتاج كلا الطرفين النظر فيها (اقصد بالطرفين الشخص اللي
يعرض قطط + اللي يبحث عن قطط)

بالنسبه للأشخاص اللي يعرضون قططهم للتبني :

1- ضروري تتأكدون من الاشخاص اللي يطلبون قططكم

(يكون عمرهم مناسب لتحمل مسؤوليه حيوان , ظروفهم بالبيت مناسبه و اهم شئ اهلهم موافقين ومتقبلين الفكره لأن بالغالب مصير هالقطط المسكينه خصوصاً لو كانت "محليه" وقت ماطفشوا يرمونها بالشارع)

بعض الاعضاء لما يرد على عرضهم اكثر من شخص لاحظت انهم يمشون بالدور مثلاً (لو ماتم الاتفاق مع اول شخص رد يروحون للثاني وكذا) وطبعاً هالطريقه غلط ! القط مو جائزه عشان يتمرر بهالطريقه ! المفروض تختار الشخص المناسب له مو تهديه للي يرد اول :/

2- الظروف اللي راح يعيش فيها القط

(اسألوا عن المكان اللي بيجلس فيه ومناسبته له , وانه ماينحبس بقفص او ينحط بالحوش)

3- صحيح القط راح يكون بدون مقابل مادي لكن لازم تحرصون انه قادر على تحمل تكلفته من
اكل + مستلزمات اساسيه + تكاليف البيطري

4- القطط حيوانات اجتماعيه تتعلق بأصحابها و تتعلق بمنطقتها و تنقلها الكثير من بيت لبيت و من ناس لناس "يتعبها" لأن القطط بالذات تجلس فتره على ماتتكيف لوضعها و صعبه عليها كل شوي تغير مكانها وترجع تتكيف من اول و جديد هالشئ يأثر على نفسيتها وممكن يخليها قطه خائفه ضعيفة شخصيه عدائيه وماتثق بأي احد فـ تأكدوا لما تعطون قططكم لأحد انه فعلاً يبيها وبيوفر لها بيت دائم مش مؤقت وانه مستعد لتحملها ومايتخلى عنها

الأشخاص اللي يبحثون عن قطط للتبني

1- تأكد من ظروفك وانك قادر على تحمل مسؤولية القط من كل النواحي قبل ماتقدم عالتبني لا تنسى ان الشخص لما عطاك قطه بدون مقابل فهو وثق فيك و ائتمنك على حياة القط وهالشئ ماكان سهل عليه فـ حافظ على هالأمانه ولا تفرط فيه "مش معناته القط بدون مقابل يعني رخيص بنظر اصحابه"

2- متوسط عمر القط 15 سنه وممكن تعيش اكثر فـ حط هالشئ ببالك قبل ما تتبنى قط انه
"التزام لمدى الحياه مو شئ مؤقت"

الأشياء اللي لازم تفكر فيها قبل ماتقرر تتبنى قط ,,

هل انت قادر على تحمل تكلفة القط ؟

القط ماراح يحتاج اكل و رمل فقط !

بين فتره و فتره راح تحتاج له اشياء ثانيه مثل مستحضرات العنايه (قطرات تنظيف الاذن , امشاط , فيتامينات .. الخ) و ممكن ادوات ثانيه (العاب , عامود خدش .. الخ) هذا غير التطعيمات السنويه , او في حال مرض تكاليف العلاج , لازم تفكر بهالأشياء خصوصاً لو عندك قط غيره معناته بتتضاعف عندك التكلفه

هل عندك وقت للإهتمام بالقط ؟

من ناحيه تحضير وجباته , تخصيص اوقات للتواصل معاه و اللعب , وبيحتاج وقت للعنايه اليوميه من تمشيط و تنظيف .. الخ

هل عائلتك متقبله لفكرة القط ؟

وهذي اشوفها انا اهم مسأله لأن بالغالب العائله هي اللي تتسبب بالتخلي عن القط فـ قبل ماتجيبه لازم تتأكد
انهم متقبلين الفكره 100%

و تأكد ايضاً ان ماحد من العائله عنده "حساسيه" من القطط لأن وقتها بيكون الموقف صعب خصوصاً ان بعض الناس ماينفع معاهم علاجات وبهالحاله راح تضطر تتخلى عن القط

و ايضاً لو كان عندكم "اطفال" لازم تنتبه للقط اكثر وماتخليه معاهم بدون مراقبه عشان مايأذونه , وطبعاً كل شخص ادرى بأطفاله فلو كانوا من النوع اللي يأذي الحيوانات ما اشوف ان احضار قط للمنزل فكره سليمه ولو صار له اي شئ فـ انت بتكون المسؤول

هل عندك مساحه كافيه في البيت للقط ؟

طبعاً عارفين القطط لعوبه وتحتاج مكان واسع تركض و تلعب و تتسلق و تمارس نشاطاتها فيه

وايضاً بتحتاج مكان خاص بالليتربوكس يتجدد فيه الهواء , لازم تحط هالأشياء بعين الاعتبار وتتأكد ان بيتك مهيئ للقط

مين راح يهتم بقطك لو سافرت ؟

في حال ماتقدر تاخذه معاك , لازم تفكر وين راح تحطه ؟ ادري البعض بيقول "اذا جا وقتها فكرت" بس السالفه
مو سهله وانا مجربتها ><

ابتعد عن فندقة المحلات خصوصاً اللي مافيها دكتور لأنه بكذا مابيكون فيه اشراف بيطري عليها في حال مرض القط

ابحث له عن مكان مناسب و مضمون و نظيف و ناس مهتمه تحافظ على قطك مثل ماكان عندك

هل فيه تغيير كبير راح يصير بحياتك مثلاً زواج / قدوم طفل جديد / انتقال من البيت .. الخ ؟

في هالحاله انصحك بتأجيل تبني قط لحد ماتستقر الاوضاع عشان تكون متفرغ له و لمتطلباته لأنه ايضاً يعتبر تغيير كبير بالنسبه للقط وممكن تواجه معاه مشاكل سلوكيه بالبدايه بتحتاج منك وقت و تركيز عليه

تبني قط راح يكون "اضافة فرد جديد للعائله" فـ لازم تكون انت و عائلتك مستعدين لهالتغيير و تفتحون مو
بس بيتكم لكن قلوبكم له ^^

و تذكروا القطط اللي معروضه للتبني محتاجه بيت اكثر من اللي معروضه للبيع , فـ في حال كنت تدور على قط خل خيارك الاول الجمعيات و ملاجئ الحيوانات الموجوده بمنطقتك او طبعاً شيك على قسم التبني هنا Wink

بالتوفيق جميعاً

يشرفني اكون اول وحده ارد عليكِ ومعلوماتك حلوه وشكراً

تحياتي:مميزه